:: ERREPRESIOA

7.200 euroko isuna Askekintzako kideei, San Tomasetan txerria erakustearen aurka ekiteagatik

Topatu | 2018-05-16
Mozal Legea oinarritzat hartuta jarri diete isuna erresistentzia pasiboa erabilita ekintzan parte hartu zuten hamabi ekintzaile antiespezistei. Eleak-Libre mugimenduarekin batera salatu dute gertaturikoa.

Donostiako San Tomasetan Ursula txerriaren erakusketa galarazi nahi izan zuten Askekintzako kideek, baina ekintzan parte hartzeagatik guztira 7.200€ko isuna jarri diete hamabi ekintzaile antiespezistei. Erresistentzia pasiboa praktikan jartzeagatik Mozal Legea aplikatu dietela salatu dute: "Inpunitate osoz herri mugimenduak erreprimitzen dituztenek kolpe handi bat eman nahi izan digute. Oraingoan, Donostiako Udala izan da honen sustatzailea, berriz ere Eusko Jaurlaritzaren konplizitatearekin". 

Eleak-Libre mugimenduak salatu duenez, hain zuzen, bi instituziook Mozal Legearen aurka agertu ziren legea atera orduko; praktikan, ordea, aplikatu egiten dute, 11.000 aldiz gutxienez jada Euskal Herrian. "Mozal Legea edozer gauzagatik aplikatzen digute: muralak margotzeagatik, abestiak egiteagatik, txioak idazteagatik, eta kasu honetan, txerriaren erabilera salatzeagatik", salatu du Joseba Alvarez Eleak-Libreko kideak. 

Askekintzako kideek azaldu dutenez, Donostiako Udalarekin behin baino gehiagotan hitz egiten saiatu dira animaliei ematen dien tratua dela-eta; udalak, ordea, entzungor egiten diela salatu dute, eta horregatik jo zutela ekintzara: "Neurrigabeko egite honekin isilarazi nahi izan gaituzte, baina gure aldarria inoiz baino ozenago entzunaraziko diegu: animalioi mozalik ez".

BIDEOA