:: GAZTERAIKI

Liburuxka bete proiektu, alternatibak eraikitzeko prest

Topatu | 2016-12-10
"Gu geu gara alternatiba" lelopean Barañainen aurkezturiko autogestio proiektuak herri eta auzoetan martxan jartzeko gogoz itzuli dira gazteak. Liburuxka batean batu dituzte proiektu guztiak.

Larunbateko eztabaidetan adosturiko proiektuak igandean aurkeztu eta herri eta auzoetan martxan jartzeko prest itzuli dira gazteak auzo eta herrietara. Goizean goiz, bestondoa lagun, topaketen balorazioa egin dute gazteek, ildoka. Lagunak-eko frontoira hurbildu dira eguerdirako, ekitaldi nagusirako.

Ekitaldian ildo bakoitzeko proiektuak aurkeztu dituzte gazteek, banan bana. Hemendik aurrera erabiliko duten leloa ere zabaldu dute, gazte sortzaile batzuek asteburuan zehar margotutako horma-irudi baten gainean: "Gu geu gara alternatiba". 

Asteburuan eztabaidaturiko proiektuak liburuxka batean bildu dituzte, baina ez apaletan gordetzeko: herri eta auzoetara eraman eta alternatibak sortzeko apustua egin dute hemendik aurrera.

Liburuxka sarean irakurtzeko, sartu hemen.



LARUNBATA

Eztabaidetan sakondu eta proiektuak findu dituzte 'Gazteraiki' topaketen bigarren egunean

Goizean goizetik bete dituzte Barañaingo kale eta eztabaidaguneak ehunka gaztek. Hamabi ildotan banatuta eztabaidetan murgilduta pasatu dute eguna. Proiektuak igandean aurkeztuko dituzte.

Giro onean iragan da Gazteraiki topaketetako bigarren eguna: eztabaidetan sakondu eta proiektuak fintzeko unea. Lo-lekuetako freskuratik ihes eginez goizean goizik jaiki dira gazteak, eta gosarian indarrak hartu ondotik, 10:00etarako zeuden eztabaidaguneetan, norbera bere ildoan. Ostiralean etorri ezin izan zuten beste gazte ugari elkartu zaizkie eztabaidetara, eta bezperakoari jarraipena emanez, autogestio proiektuak eraikitzen segi dute lantaldeetan.

Askotarikoak izan dira aipatu dituzten gaiak. Etxebizitzaren lantaldean, emantzipazio bulegoak eta borrokak saretzeko webgune bat; elikaduran, nekazari gazteen gida; komunikazioan, Topaturen eraberritzea eta Gazte Telebista... Proiektu guzti horiek igande goizean aurkeztuko dituzte, topaketetako azken asanbladan.

Jaia eta borroka, lotuta

Guztia ez da izan eztabaida, ordea. Feminismoko lantaldekoek, esaterako, ekintza bat egin dute eguerdian Barañaingo plazan: aldarrikapenak janzteko dantza batzuk egin dituzte, giro ederrean. Bazkaria ere izan da alternatibetarako espazio: bertako produktuekin prestaturiko plater goxoak jan dituzte gazteek arratsaldeko eztabaidetara indarberriturik joateko.

Iluntzean kulturak eta sorkuntzak hartu diete lekukoa alternatiben kateari: Urko Milagroren kontzertuak alaitu du Barañaingo gaztetxea, eta Akort, Perlak, Tremenda Jauria eta DJ Reimy-k goizaldera arte luzatu dute jaia.


OSTIRALA


Eztabaiden lehen haziak erein dituzte ehunka gaztek Barañaingo 'Gazteraiki' topaketetan

Arratsaldean iritsi dira Euskal Herriko txoko ugaritako gazteak Euskal Herriko gazte mugimenduen 'Gazteraiki' topaketetara, gogotsu eta eztabaidarako prest. Larunbatean sakonduko dute proiektuetan.

Euskal Herriko gazte mugimenduen 'Gazteraiki' topaketek eman dituzte jada lehen urratsak. Ostiral arratsaldean hasi dira pixkanaka gazteak Barañainera hurbiltzen, motxilak bizkarrean eta ildoetako eztabaidetan murgiltzeko gogoz. Barañaingo gaztetxe berriaren aurrean bildu eta eskumuturrekoak eskuratuta, lotarako lekuak bete dituzte pixkanaka.

Ordurako guztia prest zuten aste osoan zehar auzolanean aritu diren herritarrek: Alaitz ikastetxeko karpa handia muntatuta, koloretako seinalizazioak bidegurutzeetan eta eztabaidetarako guneak txukun-txukun. Lau eztabaida gune egongo dira hiru egunetan zehar: Eultza gunean feminismoa, autodefentsa eta komunikazioa izango dituzte eztabaidagai, Alaitzen elikadura burujabetza, euskara, kirola, lana eta gazte mugimenduak, Kultur Etxean etxebizitza, hezkuntza eta jai ereduak eta udaletxean sorkuntza.

Eztabaida laburra izan da ostiralekoa: arratsaldeko zazpietatik gaueko bederatzietara arte aritu dira gazteak ildoka eztabaidatzen, larunbatekoaren sarrera gisa. Larunbatean sakonduko dute gehiago proiektuetan.

Gauean, berriz, eskaintza kulturalaz gozatu ahal izan du Gazteraikik. Bertxortan bertso-antzerki ikuskizunak leporaino bete du Barañaingo gaztetxea, eta gune handiko kontzertuek dantzan jarri dituzte animatuenak.